6 قوس 1404 - 19:38
راحله یوسفی
کابل تربیون_وزارت امور خارجهٔ تاجیکستان اعلام کرده است که سه شهروند چین در یک حملهٔ مسلحانه که از سمت خاک افغانستان انجام شده، در منطقهٔ مرزی ولایت ختلان کشته شده‌اند.
این وزارت روز پنج‌شنبه، ۶ قوس، در اعلامیه‌ای گفته است که این حمله شب گذشته بر کمپ کارمندان شرکت خصوصی «شاهین اس‌ام» در نقطه مرزی ختلان صورت گرفته است.
بر پایهٔ اعلامیه، مهاجمان از یک طیارهٔ بی‌سرنشین مجهز با نارنجک و همچنان سلاح‌های خودکار استفاده کرده‌اند که در نتیجه سه کارمند چینی این شرکت جان باخته‌اند.
تاجیکستان با ابراز نگرانی از تداوم ناامنی در امتداد مرز، تأکید کرده است که با وجود تلاش‌های پیوستهٔ این کشور برای حفظ ثبات در مرزهای مشترک، «اقدامات اخلال‌گرانهٔ گروه‌های جنایی مستقر در خاک افغانستان» همچنان ادامه دارد.
وزارت خارجهٔ تاجیکستان این حمله را «به‌شدت محکوم» کرده و از طالبان خواسته است که برای تضمین امنیت و ثبات مرزی، «اقدامات مؤثر و فوری» اتخاذ کنند.
