افغان ښځینه فوټبالرانې د لا زیاتو نړۍوالو سیالیو په تمه؛ د فیفا او متحده عربي اماراتو لانجه لا دوام لري

6 کب 1404 - 19:22

کابل ټریبون - دویچوله (DW) راپور ورکړی چې د افغانستان د ښځینه فوټبال لوبغاړې، چې ډېری یې په جلاوطنۍ کې ژوند کوي، نړۍوال ډګر ته له بېرته راستنېدو څو میاشتې وروسته لاهم د منظمو نړۍوالو سیالیو په تمه دي.

د دویچوله د راپور له مخې، دغو لوبغاړو د ۲۰۲۳ کال د ښځو نړۍوال جام سیالۍ په اسټرالیا کې په ناهیلۍ سره ننداره کړې؛ ځکه چې په ۲۰۲۱ کال کې د طالبانو له بیا واکمنېدو وروسته افغانستان د ښځو د فوټبال ملي لوبډله نه لرله. که څه هم وروسته د نړۍوال رسمیت د ترلاسه کولو لپاره ځینې ګامونه اخیستل شوي، خو لا هم مهم خنډونه پر ځای دي.

مدافع لوبغاړې مرسل سعادت دویچوله ته ویلي چې د ۲۰۲۳ کال سیالیو لیدل ورته ډېر احساساتي وو او هغه وخت یې ور په یاد کړ چې تر ۲۰۲۱ مخکې یې د خپل هېواد استازیتوب کاوه. هغې هیله څرګنده کړه چې افغانستان به د غوراویو په راتلونکو پړاوونو کې ګډون وکړای شي.

د لوبډلې ګول ساتونکې الهه صفدري یوه وروستۍ لوبه په مراکش کې مهم پړاو بللی؛ خو زیاته کړې یې ده چې لوبډله لا هم د لا ډېرو نړۍوالو فرصتونو په تمه ده. هغې وویل چې لوبغاړې د نورو سیالیو د انتظار ترڅنګ خپلو تمرینونو او چمتووالي ته دوام ورکوي.

فیفا اعلان کړی چې افغانستان به د جون میاشتې د نړۍوالو سیالیو په لړ کې له دوو نامعلومو سیالانو سره مخ شي، او نور جزییات به په راتلونکو میاشتو کې خپاره شي. په اروپا کې مېشتو لوبغاړو تازه د انګلستان د ډانکاسټر ښار په روزنیز کمپ کې ګډون کړی، او تمه ده چې په اسټرالیا کې مېشتې لوبغاړې هم د روان کال په وروستیو کې ورته کمپ ترسره جوړ شي.

دویچوله راپور ورکړی چې د ۲۰۲۷ کال د ښځو نړۍوال جام، چې په برازیل کې ترسره کېږي، د غوراوي بهیر به د ښځو د اسیا جام له لارې وټاکل شي، چې ټاکل شوې د مارچ په لومړۍ نېټه په اسټرالیا کې پیل شي.

خو له نړۍوالو سیالیو څخه د افغانستان د څلور کلن واټن له امله، په راتلونکي نړۍوال جام کې د افغانستان ښځينه لوبډلې ګډون ناشونی بلل شوی دی.

راپور همداراز د متحده عربي اماراتو اړوند لانجه یاده کړې؛ یاد هېواد موافقه کړې وه چې د اکتوبر په میاشت کې د یوې لوبې کور‌بتوب وکړي؛ خو وروسته یې لوبغاړو ته د ویزو له ورکولو ډډه وکړه، چې له امله یې لوبه په بیړنۍ توګه مراکش ته ولېږدول شوه. فیفا تر اوسه د دغې پرېکړې لاملونه په عامه توګه نه‌دي روښانه کړي.

د اسټرالیا د بشري حقونو وکیلې الیسن باتیسن، چې په جلاوطنۍ کې یې د لوبغاړو ملاتړ کړی، دویچوله ته ویلي چې د ویزو موضوع «بې‌سارې» وه او ښايي پراخ سیاسي عوامل په‌کې اغېزمن وو.

دویچوله زیاته کړې چې فیفا وروسته په دوبۍ کې د فوټبال د کلنیو نړۍوالو جایزو د نوې غونډې د پیل اعلان وکړ، چې د څارونکو ترمنځ یې د فیفا او متحده عربي اماراتو د اړیکو په اړه پوښتنې راپورته کړې دي.

د دغو ننګونو سره بېره، مرسل سعادت ویلي چې په جلاوطنۍ کې د افغان ښځینه ملي لوبډلې بیا رغونه او رسمیت موندل د طالبانو د پالیسیو پر وړاندې د درېدو مانا لري. د هغې په وینا، ډېری افغانان د دې لوبډلې دوام د مقاومت نښه او د جنسیتي محدودیتونو پر وړاندې د غږ پورته کولو یو مهم پلیټفارم ګڼي.