د روسیې سفیر زیاته کړه چې لوېدیځ د نورو وسلو لېږد، په اوکراین کې د بهرنیو ځواکونو د ځای پر ځای کېدو او د اوکرایني ځواکونو د لږ تر لږه جګړهییز توان د ساتلو لپاره فشار راوړي، چې د ده په خبره دا کار جګړه اوږدوي.
هغه خبرداری ورکړ چې هر بهرنی ځواک به د روسیې له نظره «مشروع پوځي هدف» وبلل شي.
ژیرنوف وویل چې مسکو لا هم له هغو هېوادونو سره چې «ریښتیني شریکان» یې بولي، د رښتینو خبرو اترو لپاره چمتو دی.
نوموړي همداراز اروپایي ټولنه د هوکړو په ماتولو او د اوکراین په تړاو د امریکا د ډیپلوماتیکو نوښتونو په کمزوري کولو تورنه کړه او ویې ویل چې بروکسل د سولې د هڅو د ملاتړ پر ځای اوکراین ته د وسلو لېږد ته دوام ورکوي؛ هغه ادعا وکړه چې دا وسلې اوس د روسي ملکي وګړو پر ضد بریدونو کې کارېږي او دغه بریدونه د اوکرایني ځواکونو د میداني ناکامیو انعکاس دی.
متحده ایالاتو د جګړې له پیل راهیسې له اوکراین سره ښکاره سیاسي، پوځي او اقتصادي ملاتړ کړی دی.
روسیه وايي چې د دې بحران ریښې د ناټو په پراخېدو، د لوېدیځ په سیاستونو او د مسکو د امنیتي اندېښنو په نه پاملرنه کې نغښتې دي، او استدلال کوي چې د لوېدیځ ملاتړ اوکراین د روسیې پر ضد د فشار په یوې اډې بدل کړي دي.
