ځايي سرچینې په تخار ولایت کې وایي چې د چاهآب ولسوالۍ دوه اوسېدونکي، صبغت او رقیب، د سرو زرو د یوه کان د نړېدو له امله مړه شوي دي.
د سرچینو په وینا، دا پېښه د جمعې په ورځ، د کب ۱۵مه د چاهآب ولسوالۍ د سمتي سیمې په یوه د سرو زرو کان کې رامنځته شوې ده.
سرچینو زیاته کړې چې د دغو دوو قربانیانو جنازې د جمعې په ورځ شاوخوا لس بجې له غرمې مخکې په همدې سیمه کې خاورو ته وسپارل شوې.
په ورته وخت کې، د بدخشان ولایت د شهرِ بزرگ ولسوالۍ په یوه د سرو زرو کان کې یو کارګر د کان د نړېدو له امله تر خاورو لاندې بند پاتې شوی و، خو د سیمې د خلکو له شاوخوا یو نیم ساعت هڅو وروسته ژوندی راایستل شوی دی.
دا په داسې حال کې ده چې د کانونو پر فعالیتونو د معیاري څار او کنټرول د نشتوالي له امله وخت ناوخت د هېواد په بېلابېلو ولایتونو کې ورته پېښې رامنځته کېږي او د کانونو کارګران له جدي خطرونو سره مخ وي.
