امیرخان متقي او د چین ځانګړي استازي د طالبانو او پاکستان ترمنځ د نښتو په اړه خبرې وکړې

17 کب 1404 - 17:58

کابل ټریبون - د طالبانو د بهرنیو چارو وزیر امیرخان متقي په کابل کې د افغانستان لپاره د چین له ځانګړي استازي یوې شیاویونګ سره کتلي او د دواړو هېوادونو د اړیکو، سیمه‌ییزو بدلونونو او د طالبانو او پاکستاني ځواکونو ترمنځ د وروستیو نښتو په اړه خبرې کړې دي.

د طالبانو د بهرنیو چارو وزارت د یکشنبې په ورځ( د کب په ۱۷مه) په یوې خبرپاڼه کې ویلي چې په دې کتنه کې دواړو لورو د افغانستان او چین ترمنځ د اړیکو د پراختیا او د سیمې د امنیتي وضعیت په اړه د نظر تبادله کړې ده.

د اعلامیې له مخې، امیرخان متقي د افغانستان او چین اړیکې مثبتې بللي او هیله یې څرګنده کړې چې د دواړو هېوادونو ترمنځ همکارۍ به په بېلابېلو برخو کې لا نورې هم پراخې شي.

هغه همداراز د پاکستان د وروستیو بریدونو په اړه خبرې کړې او ټینګار یې کړی چې طالبان د ستونزو د حل لپاره خبرې اترې او ډیپلوماسي غوره بولي؛ خو د خپل هېواد او خلکو دفاع خپل حق ګڼي.

په همدې حال کې د چین ځانګړي استازي د وروستیو بریدونو د قربانیانو له کورنیو سره خواخوږي څرګنده کړې او ټینګار یې کړی چې بېجینګ غواړي د طالبانو او پاکستان ترمنځ اختلافونه د خبرو اترو او ډیپلوماسۍ له لارې حل شي.

هغه زیاته کړې چې چین په دې برخه کې له پاکستاني چارواکو سره هم په اړیکه کې دی او هڅه کوي چې د دواړو لورو ترمنځ کړکېچ کم او په سیمه کې ثبات وساتل شي.