د طالبانو د بهرنیو چارو وزیر امیرخان متقي وايي، د پاکستان پر وړاندې د طالبانو پوځي اقدامات د افغانستان د هوايي حریم، ملي حاکمیت او ځمکنۍ بشپړتیا د دفاع په موخه ترسره کېږي.
متقي دا څرګندونې تېره ماښام په کابل کې له بهرنیو ډیپلوماټانو، د
ملګرو ملتونو، اروپايي ټولنې او نورو نړیوالو سازمانونو له استازو سره په یوه
غونډه کې کړې دي.
هغه ادعا کړې چې د پاکستاني پوځ بریدونه له تېرو شاوخوا دوو اوونیو
راهیسې دوام لري او زیاته کړې یې ده چې پاکستان د منځګړیتوب له هڅو سره سره اوربند
مات کړی او پوځي بریدونه یې بیا پیل کړي دي.
د متقي په وینا، پاکستان د فبرورۍ په ۲۲مه د بېپیلوټه الوتکو او جنګي
جټ الوتکو په وسیله د افغانستان په بېلابېلو سیمو کې هوايي بریدونه کړي، چې د ده
په خبره پکې ځینې ملکي هدفونه هم په نښه شوي دي.
هغه ویلي چې طالبانو تر دې مخکې د فبرورۍ په ۱۷مه د منځګړیتوب د هڅو
په لړ کې درې پاکستاني اسیران د سعودي عربستان پلاوي ته سپارلي وو.
متقي ټینګار کړی چې طالبان د نورو هېوادونو د حریم د نقض او د جګړې د
پراخېدو غوښتونکي نه دي او اختلافات باید د ډیپلوماسۍ او مذاکرې له لارې حل شي.
نوموړي همداراز ویلي چې د تاریخ په اوږدو کې افغانان د فشار او زور پر
وړاندې نه دي تسلیم شوي او د خپل هېواد د ازادۍ لپاره یې قربانۍ ورکړې دي.
هغه د منځني ختیځ د کړکېچ په اړه هم اندېښنه ښودلې او له نړیوالې
ټولنې یې غوښتي چې له تحمیلي سیاستونو او پوځي اقداماتو ډډه وکړي او د هېوادونو د
ملي حاکمیت درناوی وکړي.
دا څرګندونې داسې مهال کېږي چې په وروستیو ورځو کې د طالبانو او
پاکستاني ځواکونو ترمنځ د پولې په اوږدو کې نښتې زیاتې شوې دي. طالبان وايي چې
پاکستان د افغانستان پر خاوره بریدونه کړي، خو پاکستاني چارواکي ادعا کوي چې د
افغانستان له خاورې څخه د پاکستان پر ضد د وسلهوالو ډلو فعالیتونه ترسره کېږي او
د همدې لپاره یې پوځي اقدامات کړي دي.
