د هغه په وینا، د روغتیا نړۍوال سازمان له روغتونونو او ایراني چارواکو سره په اړیکه کې دی او په هوا کې د زهرجنو موادو لکه هایدروکاربونونو، د سلفر اکسایډونو او د نایتروجن د مرکباتو د پراخ خپرېدو خطرونه څاري.
په همدې حال کې د ملګرو ملتونو د بشري حقونو دفتر هم د دغو بریدونو د چاپېریالي او روغتیايي پایلو په اړه اندېښنه څرګنده کړې او ویلي یې دي چې د نفتي تاسیساتو په نښه کول د نړۍوال بشردوستانه قانون د تناسب او احتیاط د اصولو د رعایت په اړه جدي پوښتنې راپورته کوي.
ملګرو ملتونو همدارنګه خبرداری ورکړی چې په بحرین او سعودي عربستان کې د نفتي زیربناوو پر وړاندې راپور شوي بریدونه ښايي په سیمه کې د ککړتیا د خپرېدو خطر زیات کړي او په اوږد مهال کې د تنفسي ناروغیو او د اوبو پر سرچینو ناوړه اغېز ولري.
