ننګرهار کې ټرافیکي پېښې څلور تنه مړه او یو تن ټپي کړی

8 وری 1405 - 19:13

کابل ټریبون - ننګرهار کې د طالبانو د امنیه قومندانۍ مسوولان وايي، چې د دغه ولایت بټي‌کوټ ولسوالۍ کې د ټرافیکي پېښې له امله څلور تنه مړه شوي او یو بل ټپي شوی دی.

د یادې ادارې ویاند، سید طیب حماد، د شنبې په ورځ( د وري په ۸مه) په یوې خبرپاڼه کې ویلي چې دا پېښه د باریکاب شینوارو کلي په سیمه کې رامنځته شوې ده.

د هغه په وینا، یو سویفټ ډوله موټر چې په لوړ سرعت روان و، د چلوونکي له کنټروله وتلی او د سړک غاړې له یوې ونې سره ټکر شوی دی.

هغه زیاته کړې چې د طالبانو امنیتي ځواکونه او د ټرافیکي پېښو د څېړنې ټیم سمدستي د پېښې ځای ته رسېدلي، لومړنۍ څېړنې یې ترسره کړي او ټپي کس یې د درملنې لپاره نږدې روغتیايي مرکز ته لېږدولی دی.

د سرچینو په وینا، د یاد ټپي روغتیايي حالت نازک ښودل شوی دی.