په دې اعلامیې کې د کونړ ولایت یوه پېښې ته هم نغوته شوې ده چې پهکې ماشومان له ناچاودو توکو سره لوبې کولې، چې د هغې د چاودنې له امله یو پنځه میاشتنی ماشوم وژل شوی او شپږ نور ټپیان شوي دي.
هغه ویلي چې شاوخوا ۲۴ سلنه تلفات هغه وخت پېښیږي چې ماشومان په لوبو بوخت وي، او په ځینو مواردو کې هم کله چې خلک د خپلو ژوند اړتیاوو د پوره کولو لپاره د زوړو وسپنو د راټولولو په حال کې له دغو موادو سره مخ کېږي.
بنېټ همداراز خبرداری ورکړی دی چې په وروستیو کلونو کې د نړۍوالو مرستو کمښت د ماین پاکولو فعالیتونو کمېدو، د ځینو عملیاتو درولو او د پوهې ورکولو پروګرامونو محدودېدو سبب شوی دی، چې دا موضوع خلکو ته لا زیات خطرونه جوړوي.
هغه ټینګار کړی چې ماین پاکول نه یوازې بشردوستانه عمل دی؛ بلکې د بشري حقوقو، لکه د ژوند حق، صحت او امنیت د تأمین لپاره یو اساسي شرط هم دی.
د ملګرو ملتونو ځانګړي راپور ورکوونکي له نړۍوالې ټولنې غوښتنه کړې چې د افغانستان د ماین پاکولو پروګرامونو ته مالي ملاتړ زیات کړي ترڅو د نورو تلفاتو، په ځانګړې توګه د ماشومانو، مخنیوی وشي.
