د بهرنیو چارو وزیر د عامه اړیکو مسوول ضیا احمد تکل د سېشنبې په ورځ (د وري په ۱۸مه) په یوې خبرپاڼه کې ویلي چې په دغې کتنه کې، ښاغلي متقي د دواړو هېوادونو ترمنځ د اړیکو او همکاریو د مثبتې ارزونې ترڅنګ، له چینايي سیال څخه د اورمچي مذاکراتو د تنظیم او کوربتوب له امله مننه کړې. هغه د سعودي عربستان، ترکیې، قطر او د متحده عربي اماراتو د منځګړیتوب هڅې هم ستایلې دي.
کابل کې د چین سفیر د اورمچي مذاکراتو په اړه وروستي معلومات شریک کړل او ویې ویل چې هېواد یې د افغانستان او پاکستان ترمنځ د اعتماد فضا جوړولو لپاره بېطرفه هڅې کوي.
هغه زیاته کړه چې په سیمه کې د جیوپولیتیک وضعیت په درک سره، د افغانستان او پاکستان ترمنځ د اعتماد جوړولو بهیر به په نېک نیت او له تاوتریخوالي پرته دوام ومومي.
د خبرپاڼې په حواله د طالبانو د بهرنیو چارو وزیر امیرخان متقي، هم څرګنده کړې چې د طالبانو دریځ دفاعي دی او له خپل حریم څخه دفاع خپل حق ګڼي. هغه په ټینګار سره وویل چې د متقابل احترام او پوهاوي پر بنسټ تفاهم او خبرو اترو ته دوام ورکوي.
