د طالبان د پنجشېر ولایت د مقام ویاند سیفالدین لټون رسنیو ته په استول شوې خبرپاټه کې ویلي، چې په دغه ولایت کې د زمردو د استخراج جواز بیه له ۹۰ زره افغانیو څخه ۲۵ زره افغانیو ته راکمه شوې ده.
لټون نن یکشنبه د حمل په ۲۳مه ویلي، چې د دې پرېکړې له امله د زمردو
کانونو د استخراج په برخه کې د کار زمینه هم پراخه شوې ده.
د هغه په وینا، دا مهال په پنجشېر کې د زمردو د استخراج شاوخوا ۵۰۰
شرکتونه فعال دي او نږدې ۱۵ زره کسان په دې سکتور کې پر کار بوخت دي.
پنجشېر د افغانستان له مهمو کان لرونکو ولایتونو څخه دی، چې د زمردو
ترڅنګ پکې د بېلابېلو قیمتي ډبرو کانونه هم شته. دغه ولایت په وروستیو کلونو کې د
کانونو د استخراج له پلوه د پام وړ اقتصادي ارزښت موندلی دی.
