د طالبان د کرنې، اوبو لګولو او مالدارۍ وزیر عطاءالله عمري د ازبکستان د اندیجان ولایت د والي عبدالرحمانوف په مشرۍ له ازبک پانګوالو سره دې هېواد ته د غوښو صادراتو د زیاتوالي په اړه خبرې کړې دي.
د کرنې وزارت په خبرپاڼه کې ویلي، چې دواړو لورو نن یکشنبه د یوې
ناستې پر مهال د صادراتو د پراختیا پر لارو چارو بحث کړی دی.
عمري په دې ناسته کې ویلي، چې ازبکستان ته د غوښو د صادراتو د
زیاتوالي لپاره باید په دې برخه کې پانګونه زیاته شي او معیاري مالدارۍ فارمونه
جوړ شي.
سرچینې زیاتوي، چې دواړو لورو د دوهاړخیزو همکاریو پر پراختیا هم
هوکړه کړې ده.
افغانستان په وروستیو کلونو کې هڅه کوي خپل کرنیز او مالداري محصولات
د سیمې هېوادونو ته صادر کړي.
ازبکستان د افغانستان له مهمو
سوداګریزو شریکانو څخه دی، او د دواړو هېوادونو ترمنځ د سوداګرۍ کچه په تدریجي ډول
لوړېږي.
د راپورونو له مخې، ازبکستان ته د بسته شوو غوښو صادرات د ۲۰۲۵
زېږدیز کال د سپټمبر میاشتې راهیسې د یوه رسمي تړون پر بنسټ پیل شوي او لا هم دوام
لري، چې دا بهیر د کرنې او مالدارۍ سکتور د ودې لپاره مهم بلل کېږي.
