د آناتولي خبري اژانس د راپور له مخې، پاکستان اعلان کړی چې د ایران له لارې د منځنۍ آسیا لپاره یې یو نوی ترانزیتي دهلېز فعال کړی او د دې لارې له لارې یې لومړنۍ صادراتي محموله ازبکستان ته لېږلې ده.
د راپور له مخې، دغه محموله چې منجمده غوښه پکې شامله وه، د دوشنبې په ورځ (۱۴۰۵ د حمل ۲۴مه) د تاشکند ښار ته رسېدلې، چې د پاکستان–ایران د ترانزیتي دهلېز د رسمي پیل نښه بلل کېږي.
د دې طرحې له مخې، د پاکستان صادراتي توکي د ګوادر بندر څخه، چې د چین–پاکستان اقتصادي دهلېز (CPEC) برخه ده، ایران ته لېږدول کېږي او له هغه ځایه د ځمکنۍ لارې له لارې د منځنۍ آسیا هېوادونو ته رسېږي.
شنونکي وايي، دا اقدام د اسلاماباد او تهران ترمنځ د دوهاړخیزو اړیکو د ښه کېدو او سیمهییزو همکاریو د پراخېدو په لړ کې ترسره شوی دی. د هغوی په باور، په وروستیو سیمهییزو منځګړیتوبونو کې د پاکستان رول هم د دواړو هېوادونو د نږدېوالي سبب شوی دی.
په راپور کې ویل شوي چې پاکستان په وروستیو اوونیو کې ځینې صادراتي محدودیتونه کم کړي او د خوړو، درملو او نورو ضروري توکو لېږد یې د دې لارې له لارې اسانه کړی دی.
په ورته وخت کې، اسلاماباد په وروستیو ورځو کې د امریکا او ایران ترمنځ د غیرمستقیمو خبرو کوربهتوب هم کړی، چې که څه هم له نهایي هوکړې پرته پای ته رسېدلې، خو د ځینو مواردو په اړه پکې پرمختګونه هم راپور شوي دي.
دا تحولات په داسې حال کې رامنځته کېږي چې د ترانزیتي لارو او د منځنۍ آسیا بازارونو ته د لاسرسي په برخه کې سیمهییزه سیالي روانه ده، او د پاکستان، ایران او چین رول په دې معادلو کې لا زیات مهم شوی دی.
