په سمنګان ولایت کې یو ۳۵ کلن سړی د نامعلومو وسله والو په ډزو وژل شوی دی.
د سمنګان د طالبانو د امنیه قوماندانۍ ویلي، چې دغه پېښه تېره شپه د
اکراباد سیمې په یوه کور کې رامنځته شوې ده.
د معلوماتو له مخې، وژل شوی کس فتحالله د محمد اشرف زوی او د سمنګان
ولایت اوسېدونکی و، چې د نامعلومو کسانو له خوا په خپل کور کې په ډزو وژل شوی دی.
د امنیه قوماندانۍ په وینا، بریدګرو د کلاشینکوف په وسیله څو ډزې کړې
او دغه کس یې ځای پر ځای وژلی دی.
سرچینه زیاتوي، فتحالله په یو سرا کې د ساتونکي په توګه کار کاوه او
تر اوسه د پېښې انګېزه نه ده روښانه شوې.
همدارنګه ویل شوي چې د پېښې سیمه د جنایي جرمونو د ټیم له لوري څېړل
شوې او د عاملینو د پېژندلو لپاره لومړنۍ تحقیقات پیل شوي دي.
مسؤلین وايي، تر اوسه څوک د دې قضیې په تړاو نه دي نیول شوي، خو د
عاملینو د پېژندنې او نیونې هڅې روانې دي.
