د طالبانو سترې محکمې ویلي، چې په ننګرهار او بامیان ولایتونو کې یې یوې ښځې او یو سړي ته د بېلابېلو تورونو له امله تعزیري دُرې ورکړې دي.
د یادې محکمې د خبرپاڼې له مخې، په ننګرهار ولایت کې یوه ښځه د «له
کوره تېښتې» او «له واده بهر اړیکې» په تور په یو کال او شپږو میاشتو بند او ۳۹
دُرو محکومه شوې وه، چې دغه حکم د سترې محکمې له تأیید وروسته پرې عملي شوی دی.
همداراز، په بامیان ولایت کې یو سړی د «شرابو د تولید» په تور په دوه
کاله بند او ۳۹ دُرو محکوم شوی و، چې د سترې محکمې له تأیید وروسته پرې دغه تعزیري
سزا تطبیق شوې ده.
طالبانو ویلي، چې دواړه حکمونه د دوی د محکمو د پرېکړو له مخې صادر او
عملي شوي دي.
دا په داسې حال کې ده، چې د ۲۰۲۱ کال د اګست میاشتې راهیسې، واک ته د
طالبانو له بیا رسېدو وروسته، د بدني مجازاتو لکه تعزیري دُرو د پلي کېدو موارد
زیات شوي دي.
په همدې موده کې د طالبانو محکمو په بېلابېلو ولایتونو کې د غلا، زنا،
د الکولي مشروباتو د تولید او استعمال په ګډون د بېلابېلو تورونو په تړاو کسان د
بند او تعزیري دُرو په سزا محکوم کړي دي.
که څه هم د بشري حقونو سازمانونو او نړیوالو بنسټونو بیا بیا د دغو
مجازاتو پر پلي کېدو نیوکې کړې او دا یې د بشري حقونو او نړیوالو معیارونو خلاف
بللي دي.
