د ملګرو ملتونو عمومي منشي انتونیو ګوترېش د اسرائیل او لبنان ترمنځ د اوربند د اعلان هرکلی کړی او د دې هوکړې په اسانتیا کې یې د امریکا متحده ایالاتو رول ستایلی دی.
ګوترېش په اېکس ټولنیزه شبکه کې په خپره کړې اعلامیه کې هیله څرګنده کړې، چې دا اوربند به د شخړې د اوږدمهاله حل لپاره د خبرو اترو زمینه برابره کړي او په سیمه کې د دوامدار او هر اړخیزې سولې د ټینګښت له هڅو سره مرسته وکړي.
نوموړي له ټولو ښکېلو لورو غوښتي، چې اوربند ته بشپړ درناوی وکړي او په هر وخت کې نړیوال قانون رعایت کړي.
دغه وروستی اوربند د اسرائیل او لبنان ترمنځ له څو اوونیو زیاتېدلو ترینګلتیاوو او د پولې هاخوا نښتو وروسته رامنځته شوی، چې د پراخې سیمهییزې جګړې اندېښنې یې راپارولې وې. تر دې وړاندې، د امریکا او نړیوالو شریکانو په ګډون ډیپلوماتیکو هڅو د تاوتریخوالي په مهارولو کې بشپړ بری نه و موندلی.
د تاوتریخوالي د کمولو نوې هڅې داسې مهال زیاتې شوې دي، چې د جګړې د بشري اغېزو په اړه نړیواله اندېښنه ډېره شوې او د یوې دوامدارې سیاسي حللارې غوښتنې هم زیاتې شوې دي، ځکه چې د منځني ختیځ بېثباتي لا هم د سیمې د پراخ امنیت لپاره ګواښ بلل کېږي.
