اکسيوس د دوو امریکايي چارواکو له قوله راپور ورکړی چې ډونالډ ټرمپ د شنبې په ورځ د هرمز تنګي د احتمالي تړل کېدو له امله د زیاتېدونکو ترینګلتیاوو په تړاو په سپینه ماڼۍ کې بېړنۍ غونډه کړې ده.
د راپور له مخې، دا غونډه د سپینې ماڼۍ په د وضعیت خونه کې ترسره شوې او پکې د امریکا لوړپوړو چارواکو، د بهرنیو چارو، دفاع او خزانې وزارتونو مهمو غړو ګډون درلود. په غونډه کې د وضعیت د چټک بدلون ارزونه او د واشنګټن د احتمالي غبرګون پر څرنګوالي بحث شوی دی.
چارواکو په سیمه کې د بېثباتۍ پر زیاتېدو اندېښنه څرګنده کړې، په ځانګړي ډول داسې مهال چې د هرمز تنګی — چې د نړۍ د تېلو د لېږد یوه مهمه لاره ده — د ګډوډۍ له ګواښ سره مخ دی. د نړۍ د تېلو لویه برخه هره ورځ له همدې تنګي تېرېږي، نو هر ډول تړل کېدل یا محدودیت کولی شي د نړیوالو انرژۍ بازارونو او سمندري امنیت لپاره جدي ګواښ وي.
راپور زیاتوي چې ترینګلتیا لا هم لوړه ده او که ژر ډیپلوماتیک پرمختګ ونه شي، نو نازک اوربند د ماتېدو له خطر سره مخ دی. امریکايي چارواکي وضعیت له نږدې څاري او د نورو کړکېچونو د مخنیوي لپاره پر ممکنه انتخابونو غور کوي.
تر دې مهاله امریکا د دغې غونډې وروسته کوم مشخص ګام نه دی اعلان کړی، خو دا وضعیت په سیمه کې د بېثباتۍ د زیاتېدو او د پراخې شخړې د رامنځته کېدو احتمال ته اشاره کوي.
