د امریکا ولسمشر ډونالډ ټرمپ ویلي، چې که له ایران سره هر ډول احتمالي تړون د ده تر مشرۍ لاندې وشي، نو دا به نه یوازې د اسراییل او منځني ختیځ، بلکې د اروپا، متحده ایالاتو او نورو سیمو لپاره هم سوله او امنیت تضمین کړي.
ټرمپ په یوه بیان کې ټینګار کړی، چې هغه به امریکا له ایران سره هغه څه ته چې دی یې “یو بل ناورین تړون” بولي، داخل نه کړي، او دا څرګندوي چې نوموړی په روانو کړکېچونو او مذاکراتو کې سخت دریځ لري.
هغه زیاته کړې: «که د ټرمپ تر مشرۍ لاندې تړون وشي، نو دا به سوله، امنیت او خوندیتوب تضمین کړي»، او ټینګار یې کړی چې دا ډول هوکړه به پراخ نړیوالې ګټې ولري.
ټرمپ څو ځله د ۲۰۱۵ کال له ایران سره پر اټومي تړون، چې په رسمي ډول د ګډ جامع اقدام پلان (JCPOA) په نوم یادېږي، سختې نیوکې کړې دي. هغه دا تړون د امریکا په تاریخ کې له تر ټولو بدو هوکړو څخه بللی او ویلي یې دي چې دغه تړون د ایران د اټومي پروګرام د پرمختګ مخه نه ده نیولې.
د ټرمپ وروستۍ څرګندونې داسې مهال کېږي چې د واشنګټن او تهران ترمنځ د احتمالي نوي تړون په اړه، د نازکو شرایطو او نامعلوم وضعیت تر سیوري لاندې، ډیپلوماتیکې هڅې روانې دي.
