د طالبانو د بهرنیو چارو وزارت په یوه اعلامیه کې ویلي، چې د یاد وزارت وزیر امیرخان متقي د ایران د بهرنیو چارو له وزیر سید عباس عراقچي سره ټیلیفوني خبرې کړې دي.
د وزارت په وینا، په دې ټیلیفوني تماس کې دواړو لورو د دوهاړخیزو
اړیکو د وروستیو بدلونونو او همداراز د مهمو سیمه ییزو مسایلو په اړه د نظر
تبادله کړې ده.
په اعلامیه کې راغلي جې امیرخان
متقي د دواړو هېوادونو ترمنځ د همکاریو بهیر مثبت او د پرمختګ په حال کې بللی او د
سوداګریزو راکړو ورکړو د کچې له زیاتوالي او په بېلابېلو برخو کې د همکاریو له
پراختیا یې خوښي څرګنده کړې ده.
نوموړي همداراز د ایران او امریکا له لوري د ډیپلوماسۍ پر بنسټ چلند
یو رغوونکی ګام بللی او د ستونزو د حل لپاره یې پر خبرو اترو او مذاکرې ټینګار کړی
دی.
د اعلامیې له مخې، د ایران د بهرنیو
چارو وزیر سید عباس عراقچي هم د دوه اړخیزو
اړیکو د پرمختګ او د همکاریو د زیاتوالي ستاینه کړې او د دې اړیکو د لا پراختیا په
اړه یې خپل نظرونه له افغان لوري سره شریک کړي دي.
په دې تماس کې د ایران د بهرنیو چارو وزیر خپل افغان سیال د ایران او
امریکا ترمنځ د روانو مذاکراتو د وروستي وضعیت په اړه هم معلومات ورکړي دي.
