د تخار ولایت ځايي سرچینې وايي چې د دغه ولایت په مرکزي روغتون کې یو پایواز (د ناروغ ملګری) د نسایي او ولادي څانګې دننه پر روغتیايي کارکوونکو او ډاکټرانو د چاقو برید کړی دی.
د سرچینو په وینا، دا پېښه د ۱۴۰۵ کال د ثور په ۳مه، د پنجشنبې په ورځ
رامنځته شوې چې له امله یې لږ تر لږه پنځه تنه، د څو روغتیايي کارکوونکو په ګډون،
ټپیان شوي دي.
د ټپیانو د روغتیايي وضعیت په اړه تر اوسه کره معلومات نه دي ورکړل
شوي.
د دې برید د انګېزې او د بریدګر د هویت په اړه نور جزئیات نه دي خپاره
شوي، خو ویل کېږي چې د طالبانو امنیتي ادارو او د روغتون مسؤلینو د پېښې په اړه
څېړنې پیل کړې دي.
د طالبانو ځایي چارواکو تر اوسه په دې اړه رسمي څرګندونې نه دي کړې.
دا په داسې حال کې ده چې په ځینو دولتي روغتونونو کې یو شمېر ناروغان
او د هغوی پایوازان د ډاکټرانو له لوري د بېپروايۍ او کمپاملرنې شکایتونه کوي؛
هغه موضوع چې کله ناکله د پایوازانو او روغتیايي کارکوونکو ترمنځ د شخړو لامل هم
ګرځي.
