د میدانوردګ ولایت د طالبانو مسوولینو ویلي چې د دغه ولایت په جغتو ولسوالۍ کې د دېوال نړېدو له امله دوې ښځې مړې شوې دي.
د میدانوردګ د طالبانو د ولایت مقام د خبرپاڼې له مخې، دا پېښه د ۱۴۰۵
کال د ثور په ۲مه، د چهارشنبې په ورځ، د جغتو ولسوالۍ اړوند د «دهنې» کلي کې
رامنځته شوې ده.
د خبرپاڼې پر بنسټ، مړې شوې ښځې ۱۵ او ۲۲ کلنې وې چې د دېوال د نړېدو
له امله یې ژوند له لاسه ورکړی دی.
څو ورځې وړاندې هم په همدې ولسوالۍ کې د ورته پېښې له امله دوه
ماشومان مړه شوي وو.
د راپورونو له مخې، د تېرو څو اوونیو پرلهپسې ورښتونو له امله د
کورونو د بامونو او دېوالونو د نړېدو لسګونه پېښې ثبت شوې دي. همداراز، د سېلابونو
او غرښوېدنو له کبله په دې موده کې نږدې ۲۰۰ تنه هېوادوال مړه شوي دي.
د یادونې ده چې وروستیو ورښتونو په ټول هېواد کې شاوخوا ۲۰ زره کورونه
ویجاړ کړي او زرګونه جریبه کرنیزې ځمکې یې هم زیانمنې کړې دي.
