سي بي اس راپور ورکړی چې یو امریکايي ځانګړی سرتېری د دې په تور نیول شوی چې د ونزویلا د مشر نیکولاس مادورو د نیولو له اعلان مخکې یې د محرمو معلوماتو په کارولو شرطبندي کړې ده.
د راپور له مخې، د امریکا پوځ ماسټر سارجنټ ګینن کین وان ډایک تورن دی چې د «Polymarket» په نوم د وړاندوینې په یوه انلاین پلاتفورم کې یې له ۳۳ زره ډالرو ډېر شرط لګولی او له همدې لارې یې تر ۴۰۹ زره ډالرو زیات عاید ترلاسه کړی دی.
فدرالي څارنوالانو په نیویارک کې پر نوموړي د څو جرمونو تورونه لګولي، چې پکې د محرمو حکومتي معلوماتو ناقانونه کارول، درغلي او د ناقانونه عوایدو پر بنسټ مالي راکړې ورکړې شاملې دي.
د امریکا د عدلیې وزارت ویلي چې نوموړی د یادو پوځي عملیاتو د پلان او تطبیق په بهیر کې ښکېل و او ادعا کېږي چې له حساسو معلوماتو یې د شخصي مالي ګټې لپاره ناوړه استفاده کړې ده.
چارواکو ویلي، وان ډایک د ګډو ځانګړو عملیاتو قوماندانۍ (JSOC) د مخابراتو متخصص و او له ۲۰۰۸ کال راهیسې په فعاله دنده بوخت و. د پېښې پر مهال هغه د شمالي کارولینا ایالت په «فورټ براګ» پوځي اډه کې مېشت و.
د پلټنو له مخې، تورن وروسته هڅه کړې چې خپل هویت پټ کړي، او ان یې د شرطبندۍ له پلاتفورم څخه د خپل حساب د حذف غوښتنه هم کړې ده.
د «Polymarket» شرکت ویلي چې مشکوک فعالیت یې تشخیص کړی او موضوع یې اړوندو چارواکو ته سپارلې ده، او ټینګار یې کړی چې د داخلي معلوماتو پر بنسټ شرطبندي د دوی په پلاتفورم کې هېڅ ځای نه لري.
بلخوا، د امریکا پخواني ولسمشر ډونالډ ټرمپ ویلي چې له دې موضوع مخکې خبر نه و، خو زیاته کړې یې ده چې دا مسله به وڅېړي او دا ډول کړنې یې غندلې دي.
دا قضیه په داسې حال کې راپورته کېږي چې د ډیجیټلي وړاندوینې بازارونو په اړه اندېښنې زیاتې شوې دي او چارواکي د محرمو معلوماتو د ناوړه کارونې د مخنیوي هڅې ګړندۍ کړې دي.
