د طالبانو د چاپېریال ساتنې ملي ادارې عمومي رئیس مطیعالحق خالص د قزاقستان په استانه ښار کې د «غرونه او اقلیمي بدلونونه: له زیانمنتیا تر دوامدارې ودې» تر سرلیک لاندې په یوې تخصصي غونډه کې ګډون کړی دی.
یادې ادارې په خپله فیسبوک پاڼه لیکلي چې دا غونډه
د ۱۴۰۵ کال د ثور په ۳مه ترسره شوې، چې
پکې ګډونوالو د غرنیو سیمو پر وړاندې د اقلیمي بدلونونو له امله رامنځته شویو
ننګونو او ګواښونو، لکه د ځایي ټولنو زیاتېدونکې زیانمننه، د اوبو د سرچینو کمښت
او د ایکوسیستمونو تخریب، په اړه بحثونه کړي دي.
په غونډه کې د غرونو د اهمیت په اړه هم ټینګار شوی، چې د حیاتي سرچینو
په برابرولو او د چاپېریال د توازن په ساتلو کې مهم رول لري.
د سرچینې په وینا، د افغانستان د چاپېریال وضعیت او د دې هېواد غرنیو
سیمو ته د نړیوالې ټولنې د لا زیاتې پاملرنې اړتیا هم د بحث مهمه برخه وه.
همداراز، د اقلیمي بدلونونو سره د تطابق په برخه کې د تخنیکي همکاریو پیاوړتیا او
د پانګونې زیاتوالی هم مطرح شوي دي.
د اعلامیې له مخې د غونډې په پای کې نړیوالو پلاتفورمونو ته
وړاندیزونه وړاندې شوي، چې له مخې یې باید غرني سیمې د اقلیمي پانګونې لپاره د
لومړیتوب ساحو په توګه وپېژندل شي.
په اعلامیه کې زیاته شوي ګډونوالو د دې سیمو لپاره د مستقیمو تخنیکي
مرستو د وړاندې کولو لپاره د اغېزمنو میکانېزمونو پر جوړېدو هم ټینګار کړی دی.
دا غونډه د غرنیو سیمو د ساتنې اهمیت ته د نړیوال پام د راجلبولو او د
اقلیمي بدلونونو په شرایطو کې د دوامدارې ودې د هڅو د پیاوړتیا لپاره یو مهم ګام
بلل کېږي.
