د وي ار ډي وي د راپور له مخې، د امریکا د جورجیا ایالت کې د پولیسو د تعقیب پر مهال یوه تښتېدونکې موټر د سور څراغ له تېرېدو وروسته د لېفټ کمپنۍ له یوه موټر سره ټکر وکړ، چې له امله یې یو افغان موټرچلوونکی او د هغه مسافر پنجشنبه ناوخته ووژل شول.
د هغه ملګرو د دغه موټرچلوونکي هویت حبیبالله عزیزي ښودلی، چې یو افغان کډوال و او څو کاله وړاندې امریکا ته تللی و.
د هغه ملګري اعجاز احمدي ویلي: «له افغانستانه وتل او په امریکا کې د ښه ژوند جوړول اسانه نه دي، په داسې حال کې چې خپلې کورنۍ ته هم ملاتړ برابروې. زه یې درد احساسوم، ځکه هغه د خپلې کورنۍ یوازینی نفقهګټونکی و.»
احمدي زیاته کړې چې چارواکو دوی ته ویلي، دا پېښه هغه مهال رامنځته شوه چې پولیس د یوه موټر په تعقیب بوخت وو. «هغه د لېفټ کمپنۍ لپاره موټر چلولو، خو له بده مرغه د تعقیب موټر مستقیم پرې ولګېد،» هغه وویل، او زیاته یې کړه چې عزیزي او د هغه مسافر دواړه په ځای مړه شول.
د چاتم کاونټي د شیرف د دفتر د تګلارې له مخې، پولیس یوازې هغه مهال د لوړ سرعت تعقیب پیلولی شي چې شکمن د یوه جنايي جرم په تور تښتي او که ونه نیول شي، عامه خوندیتوب ته ګواښ پېښوي.
د شیرف دفتر د پېښې په اړه د تبصرې غوښتنو ته ځواب نه دی ویلی.
احمدي له خلکو د مرستې غوښتنه کړې څو د عزیزي جسد افغانستان ته ولېږدول شي او کورنۍ یې وروستۍ خداحافظي ترسره کړي.
هغه وویل: «زه له هر هغه چا چې زما خبرې اوري غوښتنه کوم، مهرباني وکړئ د هغه له کورنۍ سره مرسته وکړئ.»
