د طالبانو د بهرنیو چارو وزیر امیر خان متقي او د سعودي عربستان د بهرنیو چارو وزیر شهزاده فیصل بن فرحان ترمنځ په ټیلیفوني مکالمه کې پر دوهاړخیزو اړیکو، په سعودي عربستان کې د مېشتو افغانانو پر اسانتیاوو او سیمهییزو مسایلو خبرې شوې دي.
د طالبانو بهرنیو چارو وزارت د یوې اعلامیې په خپرولو سره ویلي، چې د
طالبانو د بهرنیو چارو وزیر د خبرو په پیل کې د افغانستان او سعودي عربستان ترمنځ
د اړیکو پر پراختیا ټینګار کړی او په سیمه کې یې د ثبات لپاره د سعودي هڅې ستایلې
دي.
سرچینه وايي امیر خان متقي له سعودي لوري مننه کړې چې په هغه هېواد کې
یې مېشتو افغانانو ته د «معلوماتو لېږد» په برخه کې اسانتیاوې برابرې کړې دي، او د
چارو د لا ښه پرمختګ لپاره یې په ډیپلوماتیکو استازولیو کې د بشري ظرفیت لوړول مهم
بللي دي.
د اعلامیې له مخې د سعودي عربستان د بهرنیو چارو وزیر هم د دواړو
هېوادونو ترمنځ د ډیپلوماتیکو اړیکو پر پراختیا ټینګار کړی او د ډیپلوماتیکو
استازولیو د ظرفیت لوړولو هرکلی یې کړی دی.
په اعلامیه کې راغلي چې شهزاده فیصل بن فرحان همداراز په سیمه کې ثبات
د ټولو لپاره مهم بللی او د شخړو د پای ته رسېدو لپاره یې پر خبرو اترو او ډیپلوماسۍ
ټینګار کړی دی.
دواړو لوریو د اړیکو پر دوام او په مناسب فرصت کې د لیدنو ژمنه کړې ده.
