رویټرز راپور ورکړی چې یو لوړپوړي امریکايي چارواکي ویلي، د امریکا او ایران ترمنځ هغه اوربند چې د اپریل میاشتې په لومړیو کې پیل شوی، د دواړو لورو ترمنځ جګړه د کانګرس د جګړې صلاحیتونو د ټاکلي ضربالاجل لپاره «پای ته رسولې» ګڼل کېږي.
د راپور له مخې، دغه چارواکي د پنجشنبې په ورځ ویلي چې جګړه، چې د فبرورۍ په ۲۸مه پیل شوې وه، اوس د «د جګړې صلاحیتونو د پرېکړې» (War Powers Resolution) له مخې پای ته رسېدلې بلل کېږي.
نوموړي زیاته کړې چې له هغه وخت راهیسې، چې دغه نازک اوربند شاوخوا درې اوونۍ مخکې نافذ شوی، د امریکا د وسلهوالو ځواکونو او ایران ترمنځ هېڅ ډول ډزې نه دي تبادله شوې.
رویټرز زیاتوي چې د امریکا پخوانی ولسمشر ډونالډ ټرمپ د جمعې تر ورځې پورې ضربالاجل درلود، څو یا جګړه پای ته ورسوي او یا هم کانګرس ته د هغې د غځولو لپاره دلیل وړاندې کړي، خو تمه کېده چې دا ضربالاجل به پرته له دې چې د جګړې په بهیر کې بدلون راولي، تېر شي.
تر دې وړاندې، شنونکو او د کانګرس سلاکارانو اټکل کړی و چې ښايي ټرمپ کانګرس ته د ۳۰ ورځني تمدید خبر ورکړي یا هم دغه ضربالاجل له پامه وغورځوي، ځکه د هغه اداره استدلال کوي چې اوربند په عملي توګه د جګړې پای ته رسېدو معنا لري.
د ۱۹۷۳ کال د جګړې صلاحیتونو د پرېکړې له مخې، ولسمشر کولی شي تر ۶۰ ورځو پورې پوځي عملیات ترسره کړي. له دې مودې وروسته، باید یا عملیات پای ته ورسوي، یا د کانګرس اجازه ترلاسه کړي، او یا هم د «نهاجتناب کېدونکي پوځي اړتیا» پر بنسټ د ۳۰ ورځني تمدید غوښتنه وکړي، څو د وسلهوالو ځواکونو خوندیتوب تضمین شي.
