د طالبانو د کورنیو چارو وزارت وایي چې په اوو ولایتونو کې د بېلابېلو جرمونو په تړاو ۲۱ کسان نیول شوي دي.
دغه وزارت په خپله اېکسپاڼه کې
لیکلي چې نیول شوي کسان د بغلان، جوزجان، ننګرهار، پکتیکا، خوست، دایکنډي او غزني
ولایتونو کې د قتل، غلا، قماربازۍ او د جعلي پیسو د کارونې په تور نیول شوي دي.
د خبرپاڼې له مخې، په بغلان ولایت
کې د برکې ولسوالۍ ۸ کسان د قماربازۍ په تړاو نیول شوي دي. په جوزجان کې ۴ کسان د قتل په
تور نیول شوي دي.
همدارنګه په ننګرهار ولایت کې ۴ کسان د غلا په
تړاو نیول شوي، او په پکتیکا ولایت کې د یوسفخېلو ولسوالۍ ۲ کسان د یو موټرسایکل د
غلا په تور نیول شوي دي.
سرچینې زیاتوي چې په خوست ولایت کې ۲ کسان د ریکشا د
غلا په تړاو نیول شوي، په دایکنډي ولایت کې یو کس د جعلي پیسو د کارونې په تور
نیول شوی او په غزني ولایت کې یو بل کس د غلا په تور نیول شوی دی.
د طالبانو د کورنیو چارو وزارت ویلي چې د عامه نظم د ګډوډۍ مخنیوي
لپاره به هېچا ته اجازه ورنه کړي چې د قانون خلاف کړنې ترسره کړي.
