د افغانستان په چارو کې د ازبکستان د ولسمشر ځانګړي استازي عصمتالله اېرګاشف د پنجشنبې په ورځ (د غویي ۱۷مه) د جاپان د نړیوالې همکارۍ ادارې (JICA) د سویلي اسیا برخې له عمومي مشر تتسویا یامادا سره لیدلي دي.
دواړو لورو په دې لیدنه کې په افغانستان کې د ټولنیزې او اقتصادي پراختیا پر ګډو پروژو خبرې کړې دي.
د ازبکستان د بهرنیو چارو وزارت په یوه خبرپاڼه کې ویلي، جاپاني لوري د افغانستان په اړه د تاشکند عملي چلند ستایلی او د ترمز ښار شته زېربناوې یې د نړیوالو بشري او ټولنیزو پروژو د پلي کېدو لپاره مناسب مرکز بللی دی.
تتسویا یامادا همداراز ویلي، جایکا لېواله ده چې د ترمز له امکاناتو څخه په بېلابېلو برخو لکه ښوونه او روزنه، روغتیا، کرنه، د خصوصي سکتور پراختیا او د نشهیي توکو د قاچاق پر ضد مبارزه کې ګټه واخلي.
دا لیدنه د ازبکستان د هغو دوامداره ډیپلوماټیکو هڅو یوه برخه بلل کېږي چې موخه یې د افغانستان لپاره د نړیوالو مرستو همغږي کول دي.
په وروستیو میاشتو کې عصمتالله اېرګاشف د بېلابېلو نړیوالو ډیپلوماټانو او سازمانونو له استازو سره لیدنې کړې دي، څو د عملي پروژو د پلي کېدو زمینه برابره شي.
