په افغانستان کې د جاپان سفارت اعلان کړی چې د جاپان د حکومت د ۲۰۲۷ کال د MEXT سکالرشیپ پروګرام لپاره د افغان محصلینو د غوښتنلیکونو بهیر پیل شوی دی.
د سفارت په خبرپاڼه کې ویل شوي چې د غوښتنلیکونو د سپارلو وروستۍ نېټه د ۱۴۰۵ کال د غبرګولي ۵مه ټاکل شوې ده. دا بورس د جاپان د پوهنې، کلتور، سپورټ، ساینس او ټکنالوژۍ وزارت له لوري وړاندې کېږي.
د معلوماتو له مخې، د ارزونې او ټاکنې ټول بهیر به په مستقیم ډول د جاپان حکومت له خوا پر مخ وړل کېږي او چارواکو ټینګار کړی چې دا پروسه به په خپلواکه او د وړتیا پر بنسټ ترسره شي.
سفارت ویلي، د آغا خان بنسټ افغانستان به د غوښتنلیکونو په راټولولو او د لیکلي ازموینې په اسانتیا کې مرسته وکړي، خو د بریالیو نوماندانو په ټاکنه کې به هېڅ رول ونه لري.
جاپاني چارواکو همداراز ټینګار کړی چې د بورس ګټونکي به د مذهب، ژبې او یا قومي تړاو له توپیر پرته، په عادلانه ډول وټاکل شي. د شرایطو او د غوښتنلیک د څرنګوالي په اړه نور جزییات د سفارت پر رسمي وېبپاڼه خپاره شوي دي.د MEXT بورس پروګرام هر کال افغان محصلینو ته وړاندې کېږي او د جاپان په پوهنتونونو کې د لوړو زده کړو او علمي څېړنو فرصتونه برابروي. افغان محصلینو مخکې هم د دې پروګرام له لارې د انجینرۍ، طب، ټولنیزو علومو او ټکنالوژۍ په برخو کې زده کړې کړې دي.
دا اعلان په داسې حال کې کېږي چې د افغانستان د زدهکړو سکتور لا هم له جدي ننګونو سره مخ دی. د طالبانو له بیا واکمنېدو وروسته، په ډېرو سیمو کې نجونې له پوهنتونونو او ثانوي زدهکړو بېبرخې پاتې دي، چې نړیوالو غبرګونونه یې راپارولي دي. نړیوال بنسټونه خبرداری ورکوي چې د ښځو پر زدهکړو محدودیتونه کولای شي د هېواد پر راتلونکي اقتصادي او ټولنیز پرمختګ اوږدمهاله اغېزې ولري.
جاپان په وروستیو کلونو کې له افغانستان سره خپلې بشري او پراختیايي مرستې ته دوام ورکړی، چې پکې د زدهکړو، روغتیا او بېړنیو مرستو برخې شاملې دي. ټوکیو ټینګار کوي چې ټولشموله زدهکړه او د بشري ظرفیتونو پراختیا د افغانستان د اوږدمهاله ثبات او بیا رغونې لپاره حیاتي ارزښت لري.
