د دایکندي د کلیو د بیارغونې او پراختیا ریاست وایي، په دغه ولایت کې یې په ۱۴ میلیونه او ۶۵۸ زره افغانۍ د یوې پرمختیایي پروژې کارونه پیل کړي دي.
دغه ریاست ویلي، یاده پروژه د UNDPیا د
ملګرو ملتونو پراختیایي پروګرام په مالي همکارۍ ترسره کېږي، چې د دایکندي ولایت په
مرکز نیلي ښار او شهرستان ولسوالۍ کې د ۱۳.۹ کیلومتره کلیوالي سړکونو جوړول پکې
شامل دي.
د معلوماتو له مخې، د دې پروژې له لارې لسګونو کسانو ته د شپږو میاشتو
لپاره د کار زمینه هم برابره شوې ده.
افغانستان په بېلابېلو ولایتونو کې د کلیوالي سړکونو جوړول د زیربناوو
د پراختیا او د خلکو د اقتصادي لاسرسي د ښه کولو مهمه برخه بلل کېږي.
په ځانګړي ډول په غرنیو او لېرې پرتو سیمو کې د سړکونو نشتوالی د خلکو
د تګ راتګ، د توکو د انتقال او د روغتیايي او تعلیمي خدماتو د ترلاسه کولو پر
وړاندې لوی خنډ ګڼل کېږي.
د وروستیو کلونو په ترڅ کې، د ملګرو ملتونو پراختیایي پروګرام او نورو
مرستندویه بنسټونو په همکارۍ په هېواد کې یو شمېر ورته پروژې پلي شوي، چې هدف یې د
لنډمهاله کاري فرصتونو برابرول او د کلیوالو سیمو د اړیکو پیاوړتیا ده.
