ملګري ملتونه په افغانستان کې د خوارځواکۍ د ژورېدونکي کړکېچ په اړه خبرداری ورکړی او ویلي یې دي چې د بشري مرستو بهیر له زیات فشار سره مخ دی، او میلیونه میندې او ماشومان د سختو ستونزو تر پولې رسېدلي دي.
د نړیوال خوراکي پروګرام (WFP) د معلوماتو له مخې، په ټول هېواد کې نږدې پنځه میلیونه میندې او ماشومان له شدیدې خوارځواکۍ سره مخ دي، او وضعیت د بېساري کچې ته نږدې شوی دی.
د دې ادارې مرستیال اجرائیه رئیس، کارل سکاو، افغانستان ته له وروستي سفر وروسته ویلي: «WFP له څو میاشتو راهیسې د خطر زنګونه وهلي دي.»
نوموړي ویلي چې په ختیځ افغانستان کې یې داسې کورنۍ لیدلې چې د خوارځواکۍ له امله کړېدلې وې او د مرستو ترلاسه کولو لپاره یې اوږده واټنونه وهلي، خو د تغذیې د موادو د کمښت له امله بېرته ګرځول شوې دي. هغه خبرداری ورکړی چې ورته وضعیت د هېواد په ډېرو برخو کې شتون لري.
راپور زیاتوي چې دا کړکېچ د څو عواملو له امله لا پسې خراب شوی، چې پکې له پاکستان سره د پولو تړل، طبیعي پېښې لکه سېلابونه او زلزلې، او د بشري مرستو په بودیجه کې چټک کمښت شامل دي. همدارنګه د نړۍ په کچه د سون توکو لوړې بیې او د منځني ختیځ کړکېچونو پورې تړلي خنډونه هم پر محدودو سرچینو فشار زیات کړی دی.
راپور همداراز د کډوالو د بېرته راستنېدو زیاتوالی هم یاد کړی او ویلي یې دي چې د روان ۲۰۲۶ کال له پیل راهیسې شاوخوا ۵۰۰ زره کسان له پاکستان او ایران څخه افغانستان ته راستانه شوي، چې دا کار پر زیانمنو ټولنو لا زیات فشار وارد کړی دی. ډېری راستنېدونکي، په ځانګړي ډول ښځې او ماشومان، خوراک، سرپناه او بنسټیزو خدماتو ته لاسرسی نه لري.
نړیوال خوراکي پروګرام د بېړنۍ نړیوالې مرستې غوښتنه کړې او ویلي یې دي چې په راتلونکو شپږو میاشتو کې په افغانستان کې د ژوند ژغورونکو عملیاتو د دوام لپاره ۳۵۰ میلیونه ډالرو ته اړتیا لري.
