د امریکا پوځ د ایران هغه ادعاوې رد کړې دي چې ګواکې د بحرین په خاوره کې د امریکا د پنځم سمندري ځواک پر مرکز او یوې سیمهییزې هوايي اډې یې برید کړی، او ویلي یې دي چې ټول احتمالي بریدونه ناکام شوي دي.
د امریکا مرکزي قومندانۍ (CENTCOM) په یوه
خبرپاڼه کې ویلي، د ایران د سپاه پاسداران انقلاب ادعاوې «ناسمې» دي او زیاته کړې
یې ده چې «د امریکايي ځواکونو پر وړاندې د ایران ټول بریدونه ناکام شوي دي.»
یادې قومندانۍ ویلي، امریکايي ځواکونه لا هم چمتو او بیدار دي او د
هغه څه پر وړاندې چې «د ایران تېری» بلل شوی، د ځواب ورکولو وړتیا لري. د راپورونو
له مخې، هېڅ امریکايي سرتېری ټپي شوی نه دی او نور جزیات سمدستي نه دي خپاره شوي.
د ایران سپاه پاسداران مخکې ادعا کړې وه چې دغه بریدونه یې د امریکا د
وروستیو اقداماتو، په ځانګړي ډول د سیمې په اوبو کې د بېړیو او ځینو اهدافو پر ضد
د عملیاتو په غبرګون کې ترسره کړي دي.
په وروستیو میاشتو کې د امریکا او ایران ترمنځ کړکېچ زیات شوی، چې
لامل یې د عربي خلیج په اوبو کې روان پوځي فعالیتونه او نازک اوربند بلل کېږي.
بلخوا، د امریکا د بهرنیو چارو وزیر مارکو روبیو د سنا په یوې
استماعیه غونډه کې قانون جوړونکو ته ویلي، چې له ایران سره «شخړه پای ته رسېدلې
ده»، خو دا څرګندونه د ډیموکرات سناتور کوري بوکر له نیوکو سره مخ شوې ده.
بوکر ویلي، وضعیت لا هم نه دی حل شوی او خبرداری یې ورکړی چې ښايي
اقتصادي پایلې ولري، په داسې حال کې چې روبیو د حکومت له تګلارې دفاع کړې او ویلي
یې دي چې پر ایران اقتصادي او پوځي فشارونه زیات شوي دي.
روبیو زیاته کړې، هر ډول احتمالي بندیزونو نرمښت به د ایران د اټومي
پروګرام د تایید وړ محدودیتونو پورې تړلی وي او د پخوانیو تړونونو سره یې پرتله رد
کړې ده.
تر اوسه په روانو ډیپلوماټیکو هڅو کې کوم څرګند پرمختګ نه دی اعلان
شوی، ځکه د امریکا او ایران ترمنځ د کړکېچ د مدیریت پر سر اختلافونه لا هم دوام
لري.
