د امریکا ولسمشر ډونالډ ټرمپ له NBC شبکې سره خپله مرکه وروسته له هغې ناڅاپي پای ته ورسوله، چې د وړاندې کوونکې کریسټن وېلکر سره یې د وروستیو ټاکنو د «درغلیو» په اړه پر ادعاوو توده لفظي شخړه وکړه.
دغه مرکه چې د یکشنبې په ورځ د NBC په «Meet the Press» خپرونه کې خپره شوه، پکې وېلکر څو ځله د ټرمپ هغه ادعاوې ننګولې چې ګواکې د کالیفورنیا روانو لومړنیو ټاکنو او د ۲۰۲۰ کال ولسمشریزو ټاکنو کې درغلي شوې ده.
کله چې له ټرمپ څخه د کالیفورنیا د ټاکنو په اړه د شواهدو غوښتنه وشوه، هغه وویل: «زه یوازې ګورم او اورم، همدا بس دی.» خو وېلکر په ځواب کې وویل، چې دا ډول څرګندونې شواهد نه ګڼل کېږي.
ټرمپ وروسته رسنۍ «فاسدې» وبللې او مرکه یې لنډه کړه، ویې ویل: «بښنه غواړم، راځئ بس یې کړو، ځکه ما نور بس کړې ده.»
د NBC د راپور له مخې، دغه مرکه د جمعې په ورځ د وېسکانسن ایالت په یوه کرنیز پروګرام کې د ټرمپ د سفر پر مهال ثبت شوې وه او څو ځله د تخنیکي ستونزو او باران له امله ګډوډه شوې وه. شبکې ویلي، چې ټرمپ د مرکې له پیل شاوخوا ۵۰ دقیقې وروسته له ځایه ووت.
دغه ناندریزه تبادله د امریکا د ایران اړوند پالیسۍ په اړه د پراخ بحث یوه برخه وه، چې پکې ټرمپ وویل، د واشنګټن ښکېلتیا به محدوده وي او اوږدمهاله جګړې ته به ونه غځېږي. هغه وویل: «موږ به څو میاشتې هلته یو او ګواښ به تر ډېره پای ته ورسېږي.»
وېلکر همداراز له ټرمپ څخه د هغه د مخکېني وړاندیز شوي ۱.۸ میلیارد ډالرو «د وسلو د سیاسي کارونې ضد» صندوق په اړه پوښتنه وکړه، چې هدف یې د هغو کسانو تاوان ورکول و، چې ادعا یې کوله حکومت ورسره ناعادلانه چلند کړی. دغه وړاندیز وروسته د ډیموکراټانو او ځینو جمهوري غوښتونکو له نیوکو وروسته لغوه شو.
خبرې د ۲۰۲۱ کال د جنورۍ شپږمې نېټې د امریکا د کانګرس ودانۍ پر پېښې هم راوڅرخېدې، چې ټرمپ یو ځل بیا خپله دا ادعا تکرار کړه چې د ۲۰۲۰ کال ټاکنې د درغلۍ ډکې وې، هغه ادعا چې محکمو او ټاکنیزو چارواکو په پراخه کچه رد کړې ده.
کله چې خبرې بېرته د کالیفورنیا لومړنیو ټاکنو ته راوګرځېدې، چې لا هم په ځینو سیالیو کې د رایو شمېرنه روانه وه، ټرمپ بیا هم د درغلیو ادعا وکړه، پرته له دې چې شواهد وړاندې کړي، چې له امله یې وېلکر بیا پرې نیوکې وکړې او بالاخره مرکه پای ته ورسېده.
