د طالبانو ویاند ذبیحالله مجاهد ادعا کړې چې د پاکستان پوځ یو ځل بیا د افغانستان پر ځینو سیمو هوايي بریدونه کړي دي.
مجاهد پر اېکس لیکلي چې په دغو بریدونو کې د کنړ، خوست او پکتیکا ولایتونو کې د ملکي وګړو کورونه بمبار شوي دي.
د هغه په وینا، په دې بریدونو کې ۱۱ ماشومان، یوه ښځه او یو سپینږیری سړی وژل شوي او ۱۴ نورې ښځې او ماشومان ټپیان شوي دي.
د طالبانو ویاند دغه بریدونه «بشري جنایت» او «تجاوز» بللي او په کلکه یې غندلي دي.
مجاهد دا هم ادعا کړې چې د پاکستان پوځ د افغانستان هوايي حریم نقض کړی او دغه بریدونه یې ترسره کړي دي.
پاکستان تر اوسه د هوايي بریدونو او یادو ادعاوو په اړه غبرګون نه دی ښودلی.
