په هلمند کې طالبانو د واليمرستیال رحیمالله محمود ویلي چې دا ولایت له ایران سره د اقتصادي همکاریو او ګډو پانګونو د پراخولو لپاره چمتو دی، او د سوداګریزو اړیکو پراختیا کولای شي د دواړو هېوادونو په ګټه تمامه شي.
نوموړي د غبرګولي په ۲۶مه، د هلمند او د ایران د جنوبي خراسان ولایت ترمنځ د اقتصادي همکاریو د ارزونې په غونډه کې وویل چې افغانستان غواړي د کرنې، صنعت او د معدني موادو د پروسس په برخو کې د ایران له تجربو ګټه واخلي.
د طالبانو د هلمند مرستیال والي د دې ولایت کرنیزو ظرفیتونو ته په اشارې سره زیاته کړه چې د کرنې په میکانیزه کولو کې د ایران د تجربو کارول کولای شي د افغانستان د کرنیزو محصولاتو کیفیت لوړ او په سیمهییزو او نړیوالو بازارونو کې یې سیاليوړتیا زیاته کړي.
محمود همدارنګه له ایراني پانګوالو او سوداګرو وغوښتل چې په افغانستان کې پانګونه وکړي، او ویې ویل چې د دواړو هېوادونو د سوداګرو ترمنځ همغږي کولای شي د اقتصادي او سوداګریزو همکاریو د پراختیا زمینه برابره کړي.
هغه د هلمند د معدني ظرفیتونو په اړه وویل چې دا ولایت ارزښتمنې معدني سرچینې لري، خو د تخنیکي امکاناتو د کمښت له امله ډېری دغه سرچینې په معیاري ډول نه استخراج او نه هم پروسس کېږي.
د نوموړي په وینا، د تخنیکي پوهې د لېږد او د پروسس فابریکو په جوړولو کې د ایران همکاري کولای شي د افغانستان د معدني محصولاتو ارزښت لوړ کړي.
د طالبانو د هلمند مرستیال والي زیاته کړه چې اوس مهال هره ورځ شاوخوا ۳۰۰ تر ۴۰۰ باروړونکي موټر د افغانستان او ایران ترمنځ له سرحدي لارو تېرېږي، خو که زیربناوې او ګمرکي اسانتیاوې پیاوړې شي، دا شمېر کولای شي په ورځ کې له ۸۰۰ تر ۱۰۰۰ موټرو پورې لوړ شي.
هغه ټینګار وکړ چې طالبان له ایران سره د اقتصادي اړیکو د پراخولو هرکلی کوي او ګډې پانګونې د دواړو ملتونو په ګټه بولي.
