ډونالډ ټرمپ ویلي چې متحده ایالات ښايي هغه پوځي تجهیزات بېرته ترلاسه کړي چې په ۲۰۲۱ کال کې د جو بایډن د ادارې د ځواکونو تر وتلو وروسته په افغانستان کې پاتې شوي وو.
د فاکس نیوز د راپور له مخې، ټرمپ د جي۷ سرمشریزې په څنډه کې خبریالانو ته ویلي چې امکان لري دغه تجهیزات بېرته ترلاسه کړي.
نوموړي ویلي: «کېدای شي ټول هغه تجهیزات بېرته ترلاسه کړم»، او زیاته کړې یې ده چې که څه هم دا وسایل ښايي اوس زاړه شوي وي، خو بېرته ترلاسه کول یې سمبولیک ارزښت لري.
ټرمپ دا څرګندونې د ایران سره د احتمالي هوکړې او د بهرنۍ پالیسۍ د نورو موضوعاتو په اړه د خبرو پر مهال کړې دي. هغه همدارنګه د بایډن لهخوا له افغانستانه د ځواکونو وتل «ناوړه شاتګ» بللی او د هغه اداره یې تورنه کړې چې پرته له فشار څخه یې پوځي تجهیزات پرېښي دي.
د امریکا د استازو جرګې د بودیجې کمېټې په وینا، په افغانستان کې پاتې شوي تجهیزات لسګونه الوتکې، زرګونه وسایط او له ۳۰۰ زرو زیاتې وسلې شاملې دي.
د امریکا د دفاع وزارت د ۲۰۲۲ کال د غبرګولي په میاشت کې اټکل کړی و چې شاوخوا ۷.۱۲ میلیارده ډالرو په ارزښت پوځي تجهیزات د طالبانو لاس ته لوېدلي، وروسته له هغې چې هغوی د ځواکونو تر وتلو وروسته پر هېواد واک ترلاسه کړ.
ټرمپ او د هغه متحدینو څو ځله د نږدې ۲۰ کلنې جګړې د پای ته رسولو لپاره د بایډن پرېکړه نیوکه کړې، په داسې حال کې چې د بایډن ادارې چارواکو مخکې دا پرېکړه دفاع کړې او ویلي یې دي چې دا تجهیزات د طالبانو تر واکمنېدو مخکې افغان حکومتي ځواکونو ته سپارل شوي وو.
بایډن هغه مهال ویلي و چې تمه کېده د امریکا لهخوا روزل شوي افغان امنیتي ځواکونه به د طالبانو پر وړاندې مقاومت وکړي، خو په پای کې یې دا کار ونه کړ.
