د جرمني د «بیلد ام زونتاګ» ورځپاڼې د راپور له مخې، جرمني ښايي د هغو افغان وګړو د ایستلو الوتنې زیاتې کړي چې په جرمونو محکوم شوي دي.
راپور زیاتوي، چې جرمني چارواکي په پام کې لري افغانستان ته د چارټر ایستلو الوتنې تر میاشتې درېو پورې زیاتې کړي. دا پرېکړه د جرمني د کورنیو چارو وزارت د استازو او د طالبانو ترمنځ د تخنیکي کچې له خبرو اترو وروسته تر غور لاندې ده.
د راپور له مخې، دا مهال لږ تر لږه ۱۰۰ افغان وګړي، چې د ایستلو حکمونه پرې صادر شوي، د جرمني په زندانونو او یا د کډوالۍ په توقیفي مرکزونو کې ساتل کېږي.
سربېره پر چارټر الوتنو، تمه ده چې د عادي سوداګریزو الوتنو له لارې د ایستلو بهیر هم دوام ومومي.
د جرمني د کورنیو چارو وزیر Alexander Dobrindt «بیلد ام زونتاګ» ته ویلي، چې افغانستان ته د جرمونو د مرتکبینو ایستل به «په منظم او باوري ډول» ترسره شي.
هغه زیاته کړې: «هر څوک چې زموږ له ساتنې ناوړه ګټه اخلي او دلته جدي جرمونه کوي، باید خپل راتلونکی په خپل هېواد کې ولټوي.»نوموړي ویلي: «زموږ ټولنه مشروعه ګټه لري چې ډاډ ترلاسه کړي مجرمان زموږ هېواد پرېږدي.»
