د امریکا سترې محکمې پرېکړه کړې چې د ډونالډ ټرمپ اداره کولای شي د امریکا او مکسیکو پر پوله د پناه غوښتونکو د ننوتلو مخه ونیسي او د «ګرځولو» یا «محدود داخلېدو» پالیسي بېرته عملي کړي.
سترې محکمې په ۶ د ۳ پر وړاندې رایو سره پرېکړه کړې چې فدرالي چارواکي کولای شي مخکې له دې چې کډوال د امریکا خاورې ته داخل شي او د پناه غوښتنه وکړي، د هغوی د فزیکي ننوتلو مخه ونیسي. دا پرېکړه د امریکا د پناه غوښتنې په سیستم کې یو مهم بدلون بلل کېږي.
قضیه د امریکا د کډوالۍ د قانون پر تفسیر راڅرخېده، ځکه دغه قانون هغو کسانو ته چې امریکا ته رسېږي، د پناه غوښتنې حق ورکوي. محکمې دا ارزوله چې یو کډوال په کوم پړاو کې «امریکا ته رسېدلی» ګڼل کېږي.
د اکثریت قاضیانو په استازیتوب، قاضي سمویل الیټو ویلي چې د عادي حقوقي تفسیر له مخې، یو کس تر هغه مخکې چې په فزیکي ډول کوم ځای ته داخل شوی نه وي، نه شي ویل کېدای چې هلته رسېدلی دی.
خو قاضۍ سونیا سوتومایور له دې پرېکړې سره مخالفت کړی او په خپل مخالف نظر کې یې ویلي چې محکمې د امریکا د پناه غوښتنې د قانون پراخ هدف او روحیه له پامه غورځولې ده.
د بشري حقونو یو شمېر سازمانونو پر دې پرېکړې نیوکه کړې او ویلي یې دي چې دا کار د ټرمپ ادارې ته اجازه ورکوي څو پناه غوښتونکي له هغو قانوني خوندیتوبونو بېبرخې کړي چې د امریکا د قوانینو او نړیوالو اصولو له مخې ورته تضمین شوي دي. د دغو بنسټونو په وینا، چارواکي باید هغه کسان وڅېړي چې د ننوتلو رسمي بندرونو ته مراجعه کوي او ډاډ ترلاسه کړي چې بېرته هغو هېوادونو ته نه ستنېږي، چې هلته د ځورونې یا نورو جدي ګواښونو سره مخ کېدای شي.
دا پرېکړه د ولسمشر ډونالډ ټرمپ د کډوالۍ د پالیسۍ لپاره یوه بله حقوقي بریا ګڼل کېږي. ټرمپ د خپلې ادارې له پیل راهیسې د سرحدي کنټرولونو پر سختولو او د ناقانونه کډوالو د ایستلو پر پراخولو ټینګار کړی دی.
د یادونې وړ ده چې د امریکا د کډوالۍ پالیسۍ او د مکسیکو پر پوله د پناه غوښتونکو د منلو څرنګوالی په وروستیو کلونو کې د دغه هېواد له تر ټولو جنجالي سیاسي او حقوقي موضوعاتو څخه ده او د محکمې وروستۍ پرېکړه ښايي د پناه غوښتنې پر بهیر او د سرحدي پالیسیو پر راتلونکي ژور اغېز ولري.
