د ونزوېلا د دوو زورورو زلزلو له امله د مړو شمېر له ۲۳۰ کسانو اوښتی، له ۴ زره او ۳۰۰ څخه ډېر کسان ټپیان شوي او د نړېدلو ودانیو تر خاورو لاندې د بند پاتې کسانو د ژغورنې عملیات لا هم روان دي.
د اسوشیټېډ پرېس د راپور له مخې، د دغو زلزلو د قربانیانو شمېر لا هم د زیاتېدو په حال کې دی او ژغورونکې ډلې د هغو سلګونو کسانو د موندلو هڅې کوي چې لا هم ورک دي او ګومان کېږي تر خاورو لاندې بند پاتې وي.
تر دې وړاندې د امریکا د جیولوجیکي سروې ادارې خبرداری ورکړی و چې د زلزلې د شدت او په اغېزمنو سیمو کې د نفوس د ګڼوالي له امله د مرګ ژوبلې شمېر ښايي زرګونو کسانو ته ورسېږي.
دغه دوه زلزلې د ۱۴۰۵ کال د چنګاښ په ۴مه د یوې دقیقې څخه په کم واټن کې د ونزوېلا د کارابوبو ایالت او د پلازمېنې کاراکاس شاوخوا سیمې ولړزولې. لومړۍ زلزله د ۷.۲ او دویمه، چې ۳۹ ثانیې وروسته رامنځته شوه، د ۷.۵ درجې په کچه ثبت شوې ده.
د راپورونو له مخې، دغو زلزلو پراخ مالي زیانونه اړولي، ګڼې ودانۍ او بنسټیز تاسیسات یې ویجاړ کړي او د ونزوېلا د تېرو څه باندې سلو کلونو له تر ټولو سختو زلزلو څخه شمېرل کېږي.
د یادونې وړ ده چې ونزوېلا د کارابین د فعالې ټکتونیکي سیمې په حوزه کې موقعیت لري او د ځمکې د پلیټونو د خوځښت له امله وخت ناوخت د سختو زلزلو شاهد وي. چارواکي وايي، د ژغورنې او لټون عملیات لا هم دوام لري او د ورکو کسانو د موندنې تر بشپړېدو پورې د مرګ ژوبلې د لا زیاتېدو احتمال شته.
