د طالبانو د کانونو او پټرولیم وزارت وايي، د هرات ولایت د غوریانو ولسوالۍ د نمکسار سیمې د مالګې کان د څلورم بلاک د استخراج تړون یې د ۵ میلیونه، ۴۹۰ زره او ۹۵۰ امریکايي ډالرو په پانګونه له یوه خصوصي شرکت سره لاسلیک کړی دی.
د دغه وزارت په خبرپاڼه کې راغلي، چې یاده سیمه ۹.۵۸ کیلومتره مربع
مساحت لري او تړون یې پرون، د ۱۴۰۴ کال د چنګاښ په ۱۰مه (چهارشنبه)، د طالبانو د
کانونو او پټرولیم وزیر ملا هدایتالله بدري او د عبدالحمید فیضي د کانکېندنې او
پروسس شرکت ترمنځ لاسلیک شوی دی.
ملا هدایتالله بدري د تړون د لاسلیک پر مهال ویلي، دغه قرارداد د ۱۵
کلونو لپاره شوی او له مخې به یې یاد شرکت د استخراج شوې مالګې د هر ټن پر سر
طالبانو ته ۱۵۰۰ افغانۍ رویالټي ورکوي. هغه زیاته کړې، چې د کان د استخراج ټولې
چارې به د وزارت له نافذه اصولو او مقرراتو سره سمې ترسره کېږي.
د طالبانو د کانونو او پټرولیم وزارت ویلي، د عبدالحمید فیضي شرکت به
په سیمه کې د ۳۵۰ زره امریکايي ډالرو په ارزښت ټولنیز خدمات هم وړاندې کړي او د
کان د استخراج له لارې به ۱۱۵ کسانو ته په مستقیم او غیرمستقیم ډول د کار زمینه
برابره شي.
