د «هانګاو» په نوم د بشري حقونو یوې ادارې ویلي، د ایران حکومت د ۲۰۲۶ کال د جون میاشتې پر مهال پنځه افغان وګړي اعدام کړي دي.
دغه بنسټ په خپل میاشتني راپور کې ویلي، یاد افغانان د ایران په
بېلابېلو سیمو کې د نشهيي توکو او ځینو نورو جرمونو په تور اعدام شوي، خو د هغوی
د هویت او نورو جزئیاتو په اړه یې معلومات نه دي خپاره کړي.
د راپور له مخې، د دغو اعدامونو په اړه ایراني چارواکو هم رسمي
معلومات نه دي ورکړي.
دا په داسې حال کې ده چې ایران د همدې تېرې میاشتې پر مهال د نهو
افغانانو په ګډون، چې د اعدام په سزا محکوم شوي وو، ټولټال ۷۵۳ افغان بندیان
طالبانو ته وسپارل، ترڅو د بند پاتې موده په افغانستان کې تېره کړي.
ایران په وروستیو کلونو کې د اعدامونو د لوړې شمېرې له امله د بشري
حقونو د نړیوالو بنسټونو له نیوکو سره مخ دی. د دغو بنسټونو په وینا، افغانان هم
په ایران کې د اعدام شويو بهرنیو وګړو د پام وړ برخه جوړوي.
