د طالبانو د هرات والي مولوي نوراحمد اسلامجار په افغانستان کې د ټاپي ګازو نللیکې پروژې له رئیس بګنج عبداللهیوف سره د دغې پروژې د کارونو د پرمختګ او چټکتیا په اړه خبرې کړې دي.
د طالبانو د هرات ولایت د رسنیو دفتر په یوه خبرپاڼه کې ویلي، دواړو
لورو په هرات کې د یوې ناستې پر مهال د ټاپي پروژې د روانو چارو، پرمختګ او د
کارونو د چټکتیا په اړه خبرې کړې دي.
د خبرپاڼې له مخې، اسلامجار ټینګار کړی چې د ټاپي پروژې چارې باید په
چټکۍ سره پر مخ یووړل شي.
سرچینې زیاته کړې، په دې ناسته کې د افغانستان او ترکمنستان ترمنځ پر
دوهاړخیزو اقتصادي اړیکو، ګډو همکاریو او د دواړو هېوادونو په صفري نقطه کې د
افغان ـ ترکمن ګډ نندارتون د جوړېدو په اړه هم خبرې شوې دي.
د طالبانو د کانونو او پټرولیم وزارت د معلوماتو له مخې، د ټاپي پروژې
د نللیکې د غځولو چارې هره ورځ شاوخوا ۵۰۰ متره پر مخ ځي، او تمه ده چې د ۱۴۰۵ کال په لومړیو کې (د ۲۰۲۷ کال په پیل کې) د هرات په برخه کې د دغې
پروژې چارې بشپړې شي.
د ټاپي پروژه د ترکمنستان ګاز د افغانستان له لارې پاکستان او هند ته
لېږدوي. دا پروژه د سیمې له مهمو اقتصادي او انرژۍ پروژو څخه ګڼل کېږي او تمه ده چې
د افغانستان لپاره د ترانزیټي عوایدو، کاري فرصتونو او سیمهییزې اقتصادي همکارۍ
په پراختیا کې مهم رول ولوبوي.
