د افغانستان د رسنیو ملاتړ سازمان (امسو) ویلي، د پیګرد خبري اژانس مسوول، جاوید نیازی، له نږدې دوو میاشتو بند وروسته د طالبانو له زندانه خوشې شوی، خو ټینګار یې کړی چې د یوه خبریال خوشې کېدل د رسنیو د ازادۍ د تضمین لپاره بسنه نه کوي او ټول بندي خبریالان باید بېقیده او بېشرطه ازاد شي.
دغه سازمان د ۱۴۰۵ کال د چنګاښ
په ۱۵مه په خپره کړې اعلامیه کې ویلي، جاوید نیازی د روان کال د غويي په ۱۶مه د
طالبانو د استخباراتو ادارې ته تر احضارېدو وروسته نیول شوی و.
د اعلامیې له مخې، که څه هم جاوید نیازی خوشې شوی، خو لا هم یو شمېر
خبریالان د طالبانو په بند کې دي.
امسو د جاوید نیازي نیول، محاکمه او بند «د بشري حقونو او د رسنیو د
ازادۍ د اصولو ښکاره نقض» بللی او په افغانستان کې یې د خبریالانو د دوامدارو
نیونو، ګواښونو او محدودیتونو په اړه ژوره اندېښنه څرګنده کړې ده.
دغه بنسټ ټینګار کړی چې هېڅ خبریال باید یوازې د خپل مسلکي فعالیت یا
د بېلابېلو پلمو له امله له ګواښ، محاکمې او زندان سره مخ نه شي.
امسو له طالبانو غوښتي چې ټول بندي خبریالان او د رسنیو فعالان بېله
کوم شرطه خوشې کړي، د خبریالانو بنسټیز حقونه، لکه مدافع وکیل ته لاسرسی، عادلانه
محاکمه او د کاري خوندیتوب حق، رعایت کړي.
په اعلامیه کې همداراز له طالبانو غوښتل شوي چې له اجباري اعترافونو
او هر هغه اقدام څخه ډډه وکړي چې د بشري حقونو خلاف وي، او په افغانستان کې د
رسنیو لپاره د ازاد، خوندي او خپلواک فعالیت زمینه برابره کړي.
