د طالبانو د کلیو د بیارغونې او پراختیا وزارت وايي، د پروان ولایت په کوه صافي، غوربند، شیخ علي او جبلالسراج ولسوالیو کې د اوبو رسولو ۱۴ شبکې بشپړې شوې او ګټې اخیستنې ته وسپارل شوې.
دغه وزارت په خبرپاڼه کې ویلي، یادې شبکې د آغا خان بنسټ په مالي
ملاتړ د ۴۹ میلیونه او ۴۰۰ زره
افغانیو په لګښت جوړې شوې دي. د وزارت په وینا، د دغو پروژو په بشپړېدو سره ۲ زره او ۴۳۴ کورنیو ته د پاکو څښاک اوبو زمینه برابره شوې ده.
د سرچینې د معلوماتو له مخې، له دغو ۱۴ شبکو څخه ۱۲ شبکې د لمریزې برېښنا پر سیستم سمبالې دي او دوې نورې له طبیعي چینو
څخه اوبه ترلاسه کوي.
په همدې مناسبت جوړو شویو مراسمو کې د آغا خان بنسټ مرکزي استازي حبیب
حسین عاقل ویلي، یاد بنسټ په پروان ولایت کې د ۸۲
میلیونه افغانیو په ارزښت د اوبو رسولو یو شمېر پروژې پلي کوي، چې
تازه بشپړې شوې شبکې هم د همدغو پروژو برخه دي.
د یادونې وړ ده، چې د افغانستان په ډېری کلیوالو سیمو کې د پاکو څښاک
اوبو کمښت لا هم یوه اساسي ستونزه ده. د اوبو رسولو د شبکو جوړول د خلکو د
روغتیايي وضعیت په ښه والي، د اوبو د لېږد د ستونزو په کمېدو او د اوبو له ککړتیا
څخه د رامنځته کېدونکو ناروغیو په مخنیوي کې مهم رول لري.
