ټریڼډ نیوز راپور ورکړی چې د ایران، افغانستان او تاجکستان چارواکو د درې اړخیزو ټرانزیټي همکاریو او د سړکونو له لارې د بار وړونکو لېږدونو د پراختیا په اړه د ایران د مشهد ښار په غونډه کې خبرې کړې دي.
د ایران د سړکونو او ښار جوړونې وزارت ویلي، دغه دوه ورځنۍ غونډه د ۱۴۰۵ کال د چنګاښ په ۲۳مه او ۲۴مه د رضوي خراسان ولایت په مرکز، مشهد ښار کې ترسره شوې ده. د غونډې ګډونوالو د سړک له لارې د بار وړونکو لېږدونو د همکارۍ پر پیاوړتیا، د سیمهییزو ټرانزیټي دهلېزونو پر فعالولو، د سوداګریزو راکړو ورکړو پر زیاتوالي او د پراخو سیمهییزو همکاریو پر پراختیا خبرې کړې دي.
د یاد وزارت په وینا، تمه کېږي چې دغه نوښت به نړیواله سوداګري اسانه کړي او په سیمه کې به د دوامدار اقتصادي پرمختګ ملاتړ وکړي.
سرچینې زیاته کړې چې دغه غونډه د درېیو هېوادونو د ګډ ټرانزیټي ظرفیت د اغېزناک استعمال، د سیمهییزو اړیکو د پیاوړتیا، په نړیوالو ټرانزیټي دهلېزونو کې د دوی د رول د زیاتوالي او د ټرانزیټي زېربناوو د پراختیا لپاره یو مهم ګام بلل کېږي.
د Trend News د شننې له مخې، دغه درې اړخیزې خبرې اترې ښايي په سیمه کې د نوو لوژستیکي لارو د پراختیا لپاره مهم پرمختګ وي. راپور زیاتوي چې دا همکاري د ایران له هغې پراخې ستراتیژۍ سره سمون لري چې موخه یې له منځنۍ اسیا سره د نښلونې پیاوړتیا او د خپل ټرانزیټي ظرفیت ښه استفاده ده.
د راپور له مخې، ایران په وروستیو کلونو کې د International North-South Transport Corridor (INSTC)، د چابهار بندر، ختیځو سرحدي لارو او د اورګاډي پټلۍ په پروژو کې پانګونه زیاته کړې، څو ځان د سیمې د مهم ټرانزیټي مرکز په توګه مطرح کړي. راپور زیاتوي چې له افغانستان او تاجکستان سره د بار وړونکو لېږدونو د همکاریو پراختیا کولی شي د منځنۍ اسیا بازارونو ته لاسرسی ښه کړي او د ټرانزیټي عوایدو په زیاتوالي کې مرسته وکړي.
