طالبانو ویلي، چې د کورنیو ادارو، نړیوالو مرستندویه بنسټونو او د ملګرو ملتونو د استازو په ګډون په یوې بېړنۍ غونډه کې د نورستان ولایت د مرګونو سېلابونو له زیانمنو شویو سره پر بېړنۍ مرستې ټینګار شوی دی.
د طالبانو د پېښو پر وړاندې د چمتووالي ادارې په یوه خبرپاڼه کې له
ټولو همکارو بنسټونو غوښتي، چې بشري مرستې دې تر ډېره د ۷۲ ساعتونو په موده کې د
نورستان د سېلاب ځپلو کورنیو ته ورسوي.
د خبرپاڼې له مخې، په دې غونډه کې د کورنیو او نړیوالو مرستندویه
بنسټونو استازو د سېلاب ځپلو د بېړنیو اړتیاوو د پوره کولو او د مرستو د همغږۍ په
اړه خبرې کړې دي.
د نورستان وروستیو سېلابونو د پراخو مالي زیانونو ترڅنګ ګڼو خلکو ته
مرګ ژوبله هم اړولې ده.
د طالبانو د پېښو پر وړاندې د چمتووالي ادارې تر دې وړاندې ویلي وو،
چې په دغو سېلابونو کې ۲۳ کسان وژل شوي او ۸۰ نور ټپیان شوي دي.
