په خوست کې د طالبانو ښاروالۍ وايي، په دغه ولایت کې یې د ۲۱ میلیونه افغانیو په لګښت د مردیخېلو سړک د جوړولو چارې پیل کړې دي.
د ښاروالۍ مسؤلینو د شنبې په ورځ په دې مناسبت جوړو شویو مراسمو کې
ویلي، دغه سړک به د ۱.۷ کیلومتره په اوږدوالي جوړ شي، چې د سړک دواړو غاړو ته د ۳.۴
کیلومتره په اوږدوالي د ویالو او درېیو پلچکونو جوړول هم پکې شامل دي.
د خوست ښاروال عبدالرشید عمري ویلي، په روان ۱۴۰۵ لمریز کال کې یې په دغه ولایت کې د سړک جوړولو یو شمېر نورې پروژې هم
پلان کړې دي چې چارې به یې په راتلونکې کې پیل شي.
بلخوا، تېره ورځ د لوګر ولایت په مرکز پل علم ښار کې هم د ۳۰ میلیونه
افغانیو په لګښت د یوه سړک د جوړولو چارې پیل شوې.
د سړک جوړونې او بیارغونې پروژې په وروستیو کلونو کې د افغانستان په
بېلابېلو ولایتونو کې روانې دي، چې موخه یې د ښاري سیمو د تګ راتګ اسانتیا، د
ترانسپورټي شبکې پراختیا او د خلکو د ورځنیو ستونزو کمول بلل کېږي.
