د پنجشېر د طالبانو امنیه قوماندانۍ مسوولین وايي، په دغه ولایت کې د ټانک د یوې زړې مرمۍ د چاودنې له امله څلور ماشومان ټپیان شوي دي.
د طالبانو د امنیه قوماندانۍ په وینا، پېښه د زمري په ۱۲مه، ۱۴۰۵،
دوشنبه مازیګر هغه مهال شوې چې ماشومان په سیمه کې د لوبو پر مهال له یادې مرمۍ
سره مخ شوي او چاودنه رامنځته شوې ده.
مسوولین وايي، ټپیان د درملنې لپاره روغتون ته لېږدول شوي او روغتیايي
وضعیت یې د ډاډ وړ دی.
طالبانو د پېښې لامل د ماشومانو بېاحتیاطي بللې ده.
په افغانستان کې تر دې مخکې هم د زړو مرمیو او ناچاودو توکو د چاودنو
لسګونه پېښې شوې چې له امله یې د ډېرو ماشومانو په ګډون سلګونه کسان وژل شوي او ګڼ
نور ټپیان شوي دي.
که څه هم په هېواد کې د ماینپاکۍ پروګرامونه روان دي، خو لا هم په
ګڼو سیمو کې ناچاودي توکي د خلکو ژوند ګواښي او وخت ناوخت د مرګژوبلې لامل کېږي.
د ملګرو ملتونو د بشري مرستو د همغږۍ دفتر (اوچا) څه موده مخکې ویلي وو چې په افغانستان کې د ناچاودو توکو او ماینونو د
چاودنو شاوخوا ۸۰ سلنه
قربانیان ماشومان دي.
