د سوریې یوې محکمې د سېشنبې په ورځ له واکه لرې شوی ولسمشر بشار الاسد په غیابي ډول په اعدام محکوم کړ.
محکمې الاسد د سوریې د نږدې ۱۴ کلنې جګړې پر مهال د وژنو، شکنجو،
خپلسرو نیونو او د بشریت ضد جرمونو په ګډون د یو شمېر نورو جرمونو په تړاو مجرم
بللی دی.
دا د بشار الاسد پر وړاندې لومړنی قضايي حکم دی. نوموړی د ۲۰۲۴ کال په
ډسمبر میاشت کې د مخالفو وسلهوالو له پراخ برید وروسته له واکه لرې شو. د هغه له
پرځېدو سره په سوریه کې د الاسد د کورنۍ څو لسیزه واکمني او هغه اوږده او خونړۍ
جګړه پای ته ورسېده چې د سلګونو زرو سوریایانو د وژل کېدو لامل شوې ده.
الاسد هغه مهال له دمشق څخه وتښتېد چې مخالف وسلهوال د سوریې
پلازمېنې ته نږدې شوي وو. نوموړی اوس په مسکو کې ژوند کوي.
د سېشنبې په ورځ د پخوانیو حکومتي چارواکو د محاکمې پر مهال قاضي
بشار الاسد د «له مخکې پلان شوې او قصدي وژنې، د څو کسانو او ماشومانو د وژنې،
شکنجې، خپلسرو نیونو او د بشریت ضد جرمونو» په تور په اعدام محکوم کړ.
د الاسد د واکمنۍ پر مهال د سوریې یو امنیتي چارواکی عاطف نجیب هم په
اعدام محکوم شوی دی.
بشار الاسد په ۱۹۶۵ کال کې زېږېدلی او په ۲۰۰۰ کال کې وروسته له هغه د
سوریې ولسمشر شو چې پلار یې حافظ الاسد ومړ. هغه د خپلې کورنۍ واکمني او په سني
مسلمانانو اکثریت لرونکي سوریه کې د علوي مذهبي ډلې نفوذ وساته.
الاسد له ایران سره د سوریې نږدې اړیکو ته هم دوام ورکړ او د اسرائیلو
او امریکا پر وړاندې یې سخت دریځ خپل کړی و.
په ۲۰۱۱ کال کې د عربي پسرلي له پاڅونونو سره په سوریه کې د حکومت پر
وړاندې لاریونونه پیل شول. لاریون کوونکو د دیموکراتیکو اصلاحاتو غوښتنه کوله، خو
د حکومت له خوا له سخت او خونړي چلند سره مخ شول. وروسته دغه وضعیت په پراخه کورنۍ
جګړه بدل شو چې نږدې ۱۴ کاله یې دوام وکړ.
