کابل ټریبیون — د پاکستان ولسمشر آصف علي زرداري طالبان تورن کړي چې له هند سره د پاکستان پر ملکي وګړو او امنیتي ځواکونو د ترهګریزو بریدونو په برخه کې همکاري کوي.
ښاغلي زرداري ویلي، طالبان ترهګرو ډلو ته اجازه ورکوي چې د افغانستان
له خاورې څخه د پاکستان پر ضد د بریدونو لپاره کار واخلي.
د پاکستان ولسمشر طالبانو ته خبرداری ورکړی چې پر پاکستاني وګړو بریدونه
ودروي او ویلي یې دي چې د دغه هېواد وسلهوال ځواکونه د یادو ګواښونو د مخنیوي او
مقابلې وړتیا لري.
زرداري دا څرګندونې په داسې حال کې کوي چې د پاکستان او افغانستان
ترمنځ د امنیتي مسایلو پر سر اړیکې له اوږدې مودې راهیسې ترینګلې دي. پاکستان په
وار وار ادعا کړې چې د پاکستاني طالبانو تحریک (TTP) وسلهوال
د افغانستان له خاورې څخه د پاکستان پر ضد بریدونه ترسره کوي.
طالبانو تر دې وړاندې د پاکستاني چارواکو ورته ادعاوې رد کړې دي. د
طالبانو چارواکو ویلي چې په پاکستان کې ناامني د دغه هېواد داخلي ستونزه ده او
افغانستان به د بل هېواد پر ضد د بریدونو لپاره د خپلې خاورې د کارولو اجازه ورنه
کړي.
د پاکستان ولسمشر د وسلهوالو بریدونو د دوام په صورت کې د خپل هېواد
د امنیتي ځواکونو د اقدام خبرداری هم ورکړی، خو د دغو ادعاوو په اړه د طالبانو د
وروستیو څرګندونو جزئیات لا نه دي خپاره شوي.
